Saturday 27 September 2014

تجربتي مع عملية تصحيح النظر الليزيك



السلام عليكم ورحمه الله وبركاته .. 


اليوم ان شاء الله بتكلم عن عملية تصحيح النظر .. سويتها ٨ شهور تقريبا ..




كانت كل عين لها مقاس نظر ، وحده ناقصه ٤ ونص ، ووحده ٣ وثلاث ارباع يعني كنت تقريبا مااااشوف بدون نظاره ولااشي 



تقريبا من المتوسط وانا معتمده ع عدسات يوميه وبالمناسبات ملونه ونظارات بالدوام واستغنيت عن النظاره بشكل كبير اخر سنتين وصرت طول الوقت عدسات يوميه شفافه .. 

كنت بصفه دوريه اراجع افحص نظري ومايثبت ابدا دايم ناقص نص ، كثير دكاتره قالو اصبري لين ٢٠ وبعدها ابداي سوي فحص كل ٣ شهور لين يثبت وبعدها سوي العمليه يعني تقريبا اذا دخلتي ٢١ ،، 


سويت زي كلامهم وانتظرت لين دخلت ٢١ سنه .. 

سالت جميلاتي بانستغرام وتويتر كلهم تقريبا شارو علي بمركز الدكتور سالم باصفار لطب وجراحة العيون .. 

استخرت واخذت موعد ،، 

لمن وصلت اخذو قياس نظري ،، وضغط العين ،، وكشف ع القرنيه ،، وبعدها لمن كل شي جاهز بملفي دخلوني ع الدكتور ،، 

حدد لي نوع العمليه الي هي عباره عن ليزيك والي فهمته انها غير عن الليزك والليزر ،، وتتميز ان لا قدر الله بعد سنييين لو ضعف نظري اقدر اسويها مره ثانيه ،، وانه مافيها شغل بالقرنيه كثيرر ، 

ماكذب عليكم هالامور التقنيه وتحديد نوع العمليه ماكانت تهمني ابددددا لانه دكتور وعارف باذن الله شغله واش الي يناسب لي ،، 


ذكر لي انه مع التطور والتقنيه صار ممكن تصير العمليه من عمر ١٨ سنه ،، 

حددنا موعد العمليه وكان المفروض قبلها باسبوع مالبس عدسات ،، 

يوم العمليه سوو لي كم فحص للنظر وبعدها دخلوني غرفة العمليات < اسمها يخوف بس تراها هييينه مره 

الي عجببني مررررره انهم وروني جدار كله قزاز مطل على حديقه وقالو لي شوفيه ، طبعا بكم اني بدون عدسات او نظاره ماشفت شي ابدددددا كان نظري كانها صوره بدون فوكس والانوار مثل البوكيه يارب لك الحمد بس 


العمليه ماستغرقت ١٠ دقايق حتى ، يقطر الدكتور قطرات كثيرره ع العين طبعا ماتكونين حاسه بولاا شي وبعدها تحسينه ينظف او يمسح عينك كانه يكنسهاا مافي الم اطلاقا ،، البعض يجيه خوف بسيط وهالشي طبيعي لكن لاتخلينه يسيطر عليكي عادي ،الله اسهل من خلع السن بمليون مره .. 

يوم خلصت قالي الدكتور يالا شوفي القزاز ، وقتها كان ودي اسجد شكر 

الحمدلله شفتتتت الحدددديقه واااضحه واصلا اكتشفت انها حديقه ولا قبلها مادري وش الي ورا القزاز اصلا ،، 


يدخلونك غرفه ظلام ويعطونك تعليمات مابعد العمليه ،، ويقطرون بعينك قطررات كثير ، بعدها تبدا الرؤيه تقل وتغبش 

البسي نظارتك الشمسيه وبسم الله على بيتتتكم 


القطرات اول يومين متعبه شوي ترطيب ومضاد ومسكن تقريبا كل ساعتين لكن مايخالف كلها يومين وتعدي 

التزمي فيها ولاتبخلين على عينك فالترطيب ولا تقولين ماحس بالم ماراح اخذ مسكن ! مثل ماقالو لك سوي 

لانها عين ومهما كانت هذي عمليه وفيه جرح فابدااا لاتههملين المضاد ووكل الاشياء الي وصفوها لك ..


نوع عمليتي كان يحتاج تركيب عدسه لمده ٥ ايام ،، 

اول يوم الاممور سليمه وكنت اقدر اشوف لكن احس اني اجهدت عيني وقعدت باضاءه صفرا فاتحه .. كنت لابسه النظاره لكن حتى 

من بكره صباح العمليه يكون موعد ثاني يتطمن الدكتور ع الامور .. وقتها تعببت من الشمس مررره فصرت لافه طرحتي طبقات ومغطيه فيها عيني .. ونصحت صديقتي سوتها قبل اسبوعين انها تاخذ منشفه وتغطي عينها بالطريق للمركز ،، 

ثاني يوم كان متعب بالنسبه لي نفسيا كذا كنت متضايقه وماشوف شي واحس بوغز وتدمع فصرت قاعده فظلام تاام ونووووم 

ثالث ورابع وخامس يوم الحمدلله صح ماشوف مغبشش وكل ماتحطين عينك فالجوال مثلا تقفل عينك من نفسها فاصلا لاتجهدينهاا ،،، 

خامس يوم شال لي الدكتور العدسه وقالي يالااا عيشي حياتك ونشوفك بعد شهرين فموعد اخيرر ،، 

تقريبا الميك اب اسبوعين لاتحطين ، المويه اسبوع لاتدخل عينك ، العدسات من ٣ اسابيع الى شهر لاتلبسين اقصد الملونه للزينه ،، 

الترططيب خليه روتين ححياتك الي ماتستغنين عنه ! بكل مكان وبكل شنطه حطي معك قطرات مرطبه 

اصلا بتلاحظين انها تجف لو ماترطبينها فلاتصيرين بخيله على عينك ،، 


انا اخذت ١٠ ايام اجازه من الدوام .. وتقريبا اول ٥ ايام مستحيل انه احد يداوم لان الشمس  تتعب مرره 

فانتي سويها بوقت ١٠ ايام فاضيه لان القراءه بتكون صعبه وحرااام تجهدين عينك اصلا 

النظاره الشمسيه مهمه مرره اشتريها قبل العمليه من نوعيه ممتازه .. 

---


نجي للمركز والدكتور سالم ..


المركز الممرضات والاستقبال وكله تقريبا نساء ماعدا الدكتور ،، فهالشي مريح جدا 

تقريبا معدل انتظاري فكل الخمس مرات اجي فيها المركز مااجاوز ساعه يعني الامور سريع سريع تمشي الحمدلله

تقسيم المراجعات 

اول مره فحص

ثاني مره عمليه

ثالث مره يوم بعد العمليه 

رابع مره خمس ايام من العمليه

خامس مره والاخيره شهرين من العمليه 

المركز مرييح للنفس كثير والدكتور ماتطلعين الا وانتي تدعين له بالتوفيق جددا متعاون ومتفهم وماحسيت باي نوع من التوتررر اطلاقااا .. وصديقتي نفس الشي  ،، 

--

نجي لاستفساراتكم بالانستغرام

وحده استغربت سالت تطلع حبوب بعد العمليه ؟ 

الحقيقققه الجميله ان بشرتي تحسسسسسسنت مره ههههههه ليش ؟ 

لان خايفه ع عيني اني افركها بالغلط فصرت ماقرررب يدي من وجهي ابدااا 

ولاني ماقدر اتامل بشرتي بالمرايه فصرت ماشوف عيوبها .. 

ولاني اغير مخدتي كل يوم خوفا على عيني 

فتحسنت بشرتي بفررق جمييل لاحظوه صديقاتي فاول يوم داومت فيه بعد العمليه 

..

اذا تقصدون الانحراف بان كل عين نظر ، فانا عيني كانت منحرررفه اوووي هههههه زي ماذكرت فوق ،،


--

نظري الحين الحمدلله ياررب ممتاز ورجع بعد ١٢ يوم تقريبا ،، والدكتور يقول لين شهرين مايرجع ١٠٠٪ ولازم تواضبين ع قطره الي تشيل التغبيش ،، لكن احس رجع باقل من شهرين بكثيررر 

--

قطرات دائمه وطول العمر يلزمك فيها الدكتور ؟ لا مافي ابدددد لكن انا من نفسي ارطبها كل يوم اكثر من مره لان اتعب لو مارطبت احس بجفاف واحس اصدع تعودت ع عيني مرطبه .. 

-- 

البس عدسات ملونه من بعد شهر ونص تقريبا ،، 

-- 

اضرار ! للحين ماجاني شي الحمدلله ! بعد عمر ال ٤٠ ؟ احس كلل اهالينا بعد الاربعين كذا ولا كذا ضعف نظرهم واحتاجو نظارة قراءه ! 

اضرار بعد ١٠ سنين ومادري وش ! خلوني مستمتعه بهالعشر السنين وباذن الله ماراح يصير شي .. 

وكثيرررر ناس اعرفهم لهم سنيييين ومافي اي اضرار جانبيه .. 

--

نجي لتكاليف العمليه ؟


انا كلفتني ١٣ الف ريال ،، ولمن سالت عن السبب قالو لان عينك ناقصه كثيرر ! 

٢٠٠ ريال كشفيه 

٥٠٠ ريال فحص قرنيه .. 

صديقتي كلفتها ٨ الاف ريال 

ونظرها نقدر نقول ناقصه ٢ تقريبا ،، 

يعني الاسعار تتفاوت لكن عموما سعرها من ٨ ل ١٣ الف 

اكاونت المركز بتويتر 



وبس ياجميلاتي

يارب جاوبت ع كل استفساراتكم 

واي سؤال اكتبوه لي انستغرام وبجاوب عليه باذن الله 


3 comments:

  1. This comment has been removed by the author.

    ReplyDelete
  2. شكراً لك، مرا استفدت من الموضوع لأن انا ناويه اسوي العملية قريب وكنت محتاجة اعرف تفاصيلها من تجربة وموضوعك كفّى و وفّى .. يعطيك العافيه نوره

    ReplyDelete
  3. شكرا ع المعلومات، كان عندك مشاكل مع الاضاءة قبل العملية؟

    ReplyDelete

انبسط برآيكم واسئلتكم واقترحاتكم