Friday, 6 February 2015

مشترياتي الأخيره

السلام عليكم ورحمة الله وبركاته 

البوست من زمان ابي اسويه بس تاخرت علي شحنه واول ماوصلت امس بديت فالبوسست 


بسم الله نبداا 

المشتريات متنوعه من دبي وجده والكويت واغلبها شوزات 




نبداا بالاحذيه اول 

فلات من مليسا ، سويت بوست قبل عن مشترياتي من موقعهم وقت التخفيضات ، فلاتاتهم وكعوبهم مريحه وعمليه واسعارها حلوه ومعقوله جدا 

موقعهم اون لاين






صنادل من القسم الهندي بالقرية العالمية بدبي ، جربتها من العام وعجبتني وعلى طول هالسنه رجعت له ، حلو شكلها ع الرجل مررره وكرستاله نظيفف ومرتب ..



هذا حكايته حكايه ، اخذته من توري بورش الافنيوز بالكويت تقريبا ب ٤٠٠ ريال ،، كنت لابسه كعب وتعبانه من الصباح مطار ووو فجااه بدون مقدمات رجلي حلفت ماتمشي وتالمني مره خلاص شوي وافسخ الكعب وصرت بصيح شعور متعب مررررره وارضية الافنيوز تتعب بالمشي قلت  جيبو اييييي شششي دخلنا اتش اند ام كلها فلاتتات تذبح قاسيه بتزيد الطين بله .. ويوم شفت هالمزيون ههههههه لييين ومفتححح من كل جنب ررجلي تنفسست وراح البرستيج طبعا .. احبه لانه مرتفع يعني لوبتلبسينه بمكان فيه مويه او شي ماتعدمك وصراحه صايره احبه عادي جدا تشوفوني فيه بكل مكان خخ 



 سليبر من كاندي ليشيز دبي  حبيبي  ، مرره ناااعم ودك تنامين وانتي لابسته ب ٨٠ ريال طفشت مالقى اشكال حلوه عندنا غالبا كانها شراب او الي كانها بوت 



فلات من ساكور دبي ، كانو مسوين عرض تاخدين واحد والثاني مجانا بمناسبه انهم نزلو كولكشن جديد حقائب واحذيه 

ب ٨٠٠ درهم ،، 

مريح بس عشان شامواه شوفو من لبسه كيف صار من قدام ابيض يقهر ،، 



هيلز من كريستيان لوبتون صراحه ماكان ع البال ولا الخاطر ،، يومها شفت ان فرع الكويت مسوي تخفيضات ٤٠ ٪ ودخلت اون لاين كل شي اوت اوف ستوك عشان تخفيضات ،، كنت طالعه فقلت خل امر واشوف 

ودخلت وشفتت حبيبي خخ 

سعره ٣٧٠٠ واخذته ب ٢٢٥٠ بعد التخفيض ،، 

وريتكم نفسسه قبل سنه بالانستغرام فدبي لون كحلي ومخفض بس ماحمستوني وانقهرت اني تركته ومشيت 

بس سبحان الله لو شي ربي كاتبه لك بيصير نصيبك حتى لو بعد فتره 

حقي اسمه lady peep وارتفاعه ١٥٠ 

 اللون موف ، لكن يبين غاممق ، هنا عشان الاضاءه قويه يبان انه موف صريح




رابطه بالموقع 


خلصنا من الاحذية نجي للاكسسوارات



اسوره جايه حديده ماسكه وفوقها الشي الثاني مدري كيف اوصف المهم باللبس يكونون جنب بعض  شوفو كيف بالصوره 




اسورتين من هنري بندل تجي مع بعض لون روز قولد ،، تتقفل كانه مغناطيس 


الثنتين تقريبا ماوصل سعرها ٧٠٠ كانت فتره تخفيضات وكل شوي عندهم تخفيض وحلوه اكسسواراتهم تعجبني ..

رابطهم 


--

اسوره من 

jules by jules 

ماركه مو معروفه كثير ابد بلجيكيه اتوقع  .. شحنو لي ع بريدي الامريكي عادي 

حبيت الالوااان .. اخدت هذي تجربه بشوف الكواليتي وكذا 




تقريبا سعرها ٢٠٠ ريال 

رابط موقعهم 





حلق من شانيل دبي مول ،، سعره تقريبا ١٢٠٠ ريال .. عندي نفس الخامه حقت اللوقو بس اصغر ولولو ،، ماتغير لونها او اي شي ،، عيب هذا الجديد طريقه القفل تالم مره بروح محل ذهب عادي يغيره لي ان شاء الله .





سكارف فندي من رباعيات ستارز افينيو ،، كان ب ١٢٠٠ ريال اخذته ب ٥٠٠ ريااال جدددا سعيده خخخ 

خامته حلووه وباردده ومستطيل مو مربعع 


ترينك جوسي كوتور طلبته من موقعهم وقت البلاك فرايدي طلع الطقم ب ٤٨٠ ريال بدون الشحن وكذا ،، مايتقاااااارن بالاسعار بمحلهم هنا ابددددا 

الي قهرني انه نقصو علي ٥ قطع ماشحنوها وصارت لكثير غيري  ! رجعو فلوسها صح بس خلاص اش الفايده التخفيض خلص كان والقطع اوت اوف ستوك يعني ماستفدت شي 

لون باين صارخ بس بالطبيعه غاممقق كانه عودي غامق بس موف غامق < متعوب ع التشبيه 






بساكيت من اروق محلللل بدبي ، تلقونه مبنى صغيرون بين دبي مول وبين ذا ادرس ، فيه كافيه وفيه محل للشاي والبساكيت رايق واطلالته ع النافوره تجنن خصوصا بالشتاء ،، 

اطعم ننكهه عجبتني الي بالشوكلاته 

عنده العلب الي تلفين  من ورا يطلع صوت ميوزك 




صوابين حبيتها جدا جدا كهديه رجاليه اكثر من نسائيه 

تختارين ثلاث روايح 

الي خلاني اقول رجالي الروايح يغلب عليها الطابع الرجالي

بس لقيت ريحتين ناسبتني واخذت من وحده حبتين

تلقون العطور حقت ارميز والكريمات وهالاشياء بمطار دبي 

كانو مسوين خصم اخذته ب ١٥٠ ريال 






ملاعق وشوك من اول ابغاها من روائع المكتبات ودايم مخلصه ماشاءالله ، فرحت لمن شفتها بكاندي ليشيز دبي مول

الحبتين ب ٣٥ ريال ،




سبق وتكلمت فبوست سابق عن مسك ودهن اسمه زهرة الحب من القريه العالميه قسم دولة تونس

رجعت لهم هالسنه ويازيييينهم عرفوني وسالو وين اختك خخ قصدهم ع ساره 

زهرة الحب غيرو اسمه وصار ملكه الليل 

تعجبني خلطاته رايقه وصباحيه مثل المسك بس مخلوط معها اشياء ،، سر الصحراء شي جديد اقنعوني فيه ونجرب وش ورانا






لوحات من القسم الاسباني بالقريه العالميه 

عنده رسمات خيوووول تقتل من الجمااااااال خفت عشان ارواح وكذا بس ناويه اخذ منه واحتفظ فيها حتى لو ماعلقتها :( 


عندي نصيحه لكم تعلمو المكاااسره خخ بالقريه العالميه نقصي نص السعر 

صااابت كنتي كسباانه 

ماصابت ماخسرتي شي 

اللوحات بدون مبالغه نقصت النص ومشيت وخليتهم جت فلبينيه تركضض قالت اوك بس تعالي 




وبس ياحلوين


يارب يكون بوست خفيف ظل عليكم ومفيد لككم 



Thursday, 6 November 2014

غرفتي الجديده من الألف للياء


السلام عليكم ورحمه الله وبركاته 



متحمسسه للبوست مررره واكتشفت ان اليوم كملت شهر من اول يوم تغيير فالغرفه ، ترى الغرفه ناقصها كراسي للمكتب ولوحات لفوق السرير ومخدات بس استحييت اني اطول عليكم اكثرر ، 

اول يوم عوده للمدارس رحنى ايكيا وشفت سرر وقلت ليش مانغير غرفتنااا ، سررنا انا وساره ضخمه كانت بالضبط كل الغرفه سرر ، صح مريحههه واتقلبببب على كيف كيفي بس حرااام خخ تقريبا كانت ١٥٠ سم حجم الواحد منها يعني تخيلو سريرين فغرفه وحده بطول ثلاث امتار مرره كثيرر ،، علما ان قبل فتره سويرنا دواليبنا بغرفه ثانيه نقدر نقول غرفه ملابس وصارت الغرفه مافيها ملابس بس محتفظين بالدولاب للعبايات ،، 

رجعت وقلت لبابا بنغير السرر ونشيل الدولاب ونحط بالجدار حقه ورق لان الغرفه كلها ورق بس جدار الدولاب تقطع وقت ماجو يركبونه ، قال ياتغيرونها كلها وتخلونه شغل واحد ودخله عمال وحده او اصبرو عليها ، 

وكان القرار نغيرهااا كلهاا  ،، 

اولاً مساحه الغرفه ٤*٥ تقريبا ،، يعني صغيره ، فيها طاقه او دريشه او شباك واحد ، وفيها بلكونه وهذذذذا الشي الي مخليييينى متمسكييين فيها ماتتخيلون كيف نعشق اضاءه الشمس انا وساره ونحب لمن نقوم الصباح نفتح الستاير وتنوررر كل الغرفه ،، 


نبدا بالخطوات العمليه للتجهيز 


وبسم الله 

١ 

لازززم تكتبين كل شي انتي تحتاجينه ولا تستهترين باي شي يجي ببالك ،، 

مثلا انا كتبت اختيار لون بويه ، محل باركيه ، محل اثاث ، محل ستاير ، اكلم المستودع الخيري يشيل الاثاث القديم ، وبعدها بدات افرز اغراضي واحطها بكراتين وخلوها مرتبه نصيحه عشان وقت ترجيعها للغرفه يكون سهل مره وتكونين عارفه كل شي وين محوط ،، 

اول شي سويته من الخطوات ،، كلمت المستودع الله يقويهم ع عمل الخير العظيم الي يسوونه 

تتصلين تقولين عدد قطع الاثاث وشرط تكون صالحه للاستخدام عادي لو مقابض الادراج طايحه او فيه مخشات بالخشب كله مو مشكله ، هم ياخذونها ويضربونها بويه وينظفونها ويعطونها ناس تحتاجها ،، 

مادري وش كان ممكن نسوي بغرفتنا لو مافي هالخدمه المتميزه ، لان كل مره اجي بطلع قطعه من اثاث غرفتنا القديمه واقول لا حرام ابغاها تطلع كامله بكل ملحقاتها عشان تخدم الي بياخذونها اكثر 

كانت القطع ٩ مع مراتب السرير والموكيت حق الارضيه ،، 

اعطوني موعد بعد اسبوع فتره مسائيه من ٥ ل ٩ ،، ماشاء الله عماله فاهمين شغلهم بظرف ساعه كل غرفتنا كانت مجرد قطع خشب فسياره .. الخدمه مجانيه تماما من المستودع وبالاخير يطلبون توقيعك ع ورقه تبرع بالاثاث ،، 




رقم المستودع الخيري
٠١٢٦٦١٧١١١

2

الخطوه الثانيه 

صارت الغرفه فاضيه فصفى الذهن شوي 

وقررنا الوان الجدران درجتين من الرمادي ، والاثاث ابيض  ، والارضيه باركيه رمادي 





ثلاثه جدران من اللون الفاتح وواحد الي فيه الطاقه هو الغامق ،، 

البويه اخذناها من دهانات الجزيره 

اللون الغامق رقمه  YL350

اللون الفاتح رقمه YL346 

اطلبو من عندهم معلم بويه او اي احد اهلك يعرفونه ،، البويه مع شغل المعلم ماوصلت 600 ريال 

الحمدلله انا كنت مرتبه لكل شي يوم الاحد المستودع الخيري الاثنين البويه  الثلاثاء الباركيه وكلهم مشو بفضل الله زي ماخططت لهم بدون تاخير ،، 

الباركيه من محل ساره بشارع المكرونه 

رقمه 

0504378721 
0122872296

كلف 1800 ريال مع التركيب وكل شي  ،، الباركيه انواع كثير حقنى الماني تجميع وطني اتوقع وسعر المتر 80 او 75 ريال .. 

الخطوه الثالثه 

الغرفه جاهزه من بويه وباركيه وباقي الاثااااث .. 

الصراحه هالخطوه تحيرر ،، انا وساره نفسنى بجلسه بالغرفه ، لكن زي ماقلت لكم فوق الغرفه صغيرونه صح ماصار فيها دولاب بس حتى ،، مع البحث وبفضضضل الله صار عندنا جلسه ولاااا احلى 

فالجلسه كان مستحيل القاها جاهزه بحثت بالانستغرام ولقيت منجره وارتحت وتوكلنا على الله 

كنا ناوين نسوي الجلسه بس يوم رحنى قلنا يالا كل الغرفه مره وحده 

فكانت القطع 6 ، سريرين ومكتبين وجلسه ودولاب باب واحد بتشوفون ليش تحت 

رقم النجار عصام 

0503549852 

قولو من طرف نوره وبيراعيكم باذن الله ،، 

شغلهم نظيف وسوا نفسي الي ببالنا والخشب نظيف والبويه للخشب حلوه مايبان تفصيل ابدا .. اخذ الشغل 10 ايام ،، 

--

الخطوه الرابعه 

تحديد الالوان الي ندخلها فالجلسه والغرفه عموما ، كان الاختيار للموف والتفاحي بالبدايه كان ماسترد بس تعبنا ومالقيت قماش مناسب ،، 


اللون الاخضر الاول مادخلناه الا بمخدتين اخذنا من الافتح والموف والمخطط ،، والبيج الي بالمخطط خليناه للستاير 

القماش مالفيت ولا درت رحت للقثمي ،، عنده زي اقمشه ايكيا تحتارييين فيها صراحه فقرري الالوان بعدين روحي عشان ماتحتارين .. علما ان الي نجد لنا الجلسه يعني سوا المخدات والسفنج للجلسه وكذا هو نفس محل المنجره ارسلها لمحل تنجيد وقالي كم متر قماش  يبغى وجبتها له ،، وطلبت منه 15 مخده بثلاث مقاسات ،، 

-- 

الستاير خيطها لي محل النيروز ارسلني له القثمي ،، 

وهذا رقمه 

0500408573 
0504664412
0126520872

قولو من طرف نوره وابشرو باحلى تخفيض .. 


معليش كثرت بالكلام لكن ماحبيت ابخل عليكم بمعلومه تسهل فتغيير غرفكم ،، 


نجي للشكل النهااائي ،، 
















هذي الجلسسه ،، تم الاختيار لان نحتاج وحدات للتخزين وايضا مكان نجلس فيه ،، فزي مانتو شايفين فيها 6 ادراج و تحتها يشيل 9 سلات اخذتها من ايكيا 

كل درج خصصناه لشي معين ونفس الشي السلال عشان يسهل البحث 

صور لبعض محتويات الادراج 












 الصينيه الي بستاند من ميني ،، 

الستاره حقت باب البلكونه بنغيرها ماعجبنى لونها مع الجدار الفاتح .. 

--

غرفتنا فيه عامود وبعده عرض 50 سم تقريبا ويجي الجدار ، ودايم يقهرنا مساحه صغيره وشكلها يقهر فستغليناها بدولاب باب واحد فيه 7 رفوف للاحذيه الله يكرمكم 




بالصوره باين 5 رفوف طلبنا اضافه 3 ولسا ماستلمناها .. 

وخلينا الباب مرايه توفير مساحه بدل نجيبها منفصله ،، 

--

نجي للمكتب .. تفصيله خليناه عاادي وبسيط مع اربع ادراج ،  متعقدين من مكتبنا الاول كان كبير مره ،، 





ركبت ع البرواز لوحه اعلانات ماحبيت شكلها القديم المربع ، تلقونه فالمكتبات زي الفلين ،، 

حطيت قزازه وفوقها كم عطر ودهن عود ومسك الي استخدام كل يوم تقريبا ادواتي المكتبيه الضروريه من اقلام وهالامور 





اصبرو عليها شهر وماتشوفون البرواز حتى من الزحمه خخ 



حطيت فدرج كتب الجامعه حقت هالترم ، ودرج ميمورياتي وشواحني واثنين فاضيه لسا وجااايها الخير هههههه




نروح لمكتب سوير شوي 





 الشمعه من هوم سنتر ، الورد تنسيقي شرايكم بس ؟ ههههه

اثناء تصوير هالبوست كانت بتنحرق غرفتنا بس ربي ستر ، وانا وساره نقول ريحه شوي نحسب يطبخون اهلي لانه وقت غدا هههههه 


 نجي للتسريحه نفسها حقتنى الاولى لانها مو تبع الغرفه القديمه ، ومرتاحين عليها جددا من ايكيا .. والاضاءه ايضا ايكيا ،، 


اربعه ادراج الواحد منهم يشيل ثلاث من البلاستيك المنظمات حقت ايكيا ، سبق تكلمت عن ترتيب التسريحه ،، درج ميك اب ودرج عده الاظافر ودرج اكسسوارات ودرج اشياء البشره .. 

شوفو حجم الدرج 

السرير

مقاسه 120*200 ممتاااز جددا لبنات بالغات عاقلات ويحبون يتقلبون ههههه 

اللحاف من ايكيا ، المرتبه جامبو من سليب هاي واخذت معاها لباده من نفس المحل ، يصير السرير لينن ويجيب العافيه زي الفنادق  

سعر المرتبه 800 واللباده 175 ، بس انا وساره طلعت لنا الاربع قطع 1400 ريال لاننا عملاء للفرع ،، 





الاضاءه من ايكيا 



صوره للباده 


الحمدلله الغرفه تغيرت 180 درجه وباين وسيععهه وماحسينى بضيق ابدا مكفيه وزياده ،، 

دايما لاتعوقك مساححه المكان ،، العبي بالافكار واستغلي الغرض الواحد لاكثر من استخدام وبتبدعيين اكيد 



--

 تم بحمد الله 

ورده لكل وحده فيكم لان حماسكم كان داعم كبير اننا نحاول نخلصها بسرعه ،، 

يارب تعجبكم ونفرح باي اقتراحات لفوق السرير ومخدات حلوه 

انتظظظظر رايكم بالانستغررام 

احببكم