Saturday 5 July 2014

كيف اطلب من النت ؟ تعلمي معايا خطوه بخطوه



السلام عليكم ورحمة الله وبركاته .. 

يارب كلكم بخيرر 

الموضوع من زمان وانا واعدتكم فيه كيف نتعلم مع بعض نطلب من النت ؟ 

الصراحه مانويت اسويه الحين لكن قلت بالانستغرام اني بعرض شنط بميزانيات مختلفه ، وحسيت الموضوع يتطلب اني اذكر شنط راح تنطلب اون لاين 

فقلت اسوي الموضوع 

وبسم الله وتوكلنا على الله 

اول نقطه حابه اذكرها والله ياجميلاتي الموضوع اسهل منه مااافي يعني لاتشوفون الموضوع طويل تحسبون السالفه صعبه بالعكس ممتعه جدددا ،، راح اذكر من الصفر فلاتستغربون لو ذكرت امور بديهيه لان كثيرر يسالون عنهاا 




-- 


نقسم الطلب من النت ع خطوات : 

١/ تحتاجين ايميل ، وطبعا كلنا عندنا ايميل والحمد لله 

٢/ تحتاجين فيزا ، وراح اشرحها بالتفصيل تحت ،، 

٣/ تحتاجين بريد امريكي وراح اشرحه بالتفصيل ايضا ،، 

٤/خطوة التسجيل فالمواقع والطلب ،، 


يالا بسم الله نشرح .. 


نبدا بخطوه رقم اثنين وهي الفيزا ، 

بطاقة الفيزا انواع واشكال ومتوفره من بنوك متعدده انا ماراح اطول بالشرح بذكر النوعين الي انا جربتهم وبركز ع النوع الممتاز لنا البنات وخصوصا الغير موظفات ، 

النوع الاول : بطاقة التسوق الائتمانية : 

انا اخذتها من الراجحي لو ماعندك حساب عنده اصلا عادي بنفس الوقت تفتح لك حساب واطلبي منها فيزة تسوق ، تدفعين للفيزا ١٠٠ ريال بالسنه ، وتشحنينها كانها بطاقه عاديه كل مابغيتي تشترين شي حولتي لها من حسابك ، وطريقة التحويل سهله اسمها دفع مقدم تسوينها عن طريق النت وراح تعطيكي موظفة البنك بروشور يوضح لك طريقه فتح حسابك المصرفي عن طريق الانترنت ،، 

وهذا رابط مميزاتها من موقع الراجحي 



النوع الثاني : فيزا الماستركارد العاديه 

متوفره عند جميع البنوك وهي الي بعد ٤٥ يوم مثلا يخصمون من الراتب المبالغ الي اشتريتي فيها وتقدرين ايضا تحطين حد إئتماني لمشترياتك عشان ماتصير جدا عاليه ، وتقدرين تشحنينها ، بالنسبه لي ماحبيتها تخليني متوتره احب اشتري وادفع بنفس الوقت ،، 


فيه بعض البطايق مثل بنك البلاد والاهلي تشتغل بطاقه عاديه وفيزا ،، كل وحده تستفسر من بنكها عن نوع فيزا للتسوق وتختار الي يناسبهاا ،، 



--

نروح لخطوه رقم ثلاثه وهي البريد الامريكي : 


البريد الامريكي او الصيني او غيره ، فيه شركات كثير توفره مثلا ارامكس تعطيكي عنوان بريد لكن بمجرد يوصل شي لبريدك تقوم وتشحنه لكي ! 

انا عن نفسي ماحب كذا احب تجميع الشحنات يعني اقعد اسبوعين او اكثر اطلب اطلب من مواقع كثيرررر وتقعد فالبريد حقي واشحنها مع بعض وافررح فيها لمن توصلني ههههه ، عشان كذا بقولكم ع الموقع الي انا اتعامل معه .. 


انا اخترت الوردشيب كشركه لبريدي الامريكي : 

مميزاتهم : 

رسوم تدفعينها باول مره لمن تسجلين ٩٠ ريال فقط لنوع الاشتراك البيسك الي خلونا نتكلم عنه النوع الثاني البلس  للي طلبياتهم مره كثيره ويحتاجون يشحنون لكذا عنوان ، 

يعطيكي بريد امريكي 

يجمع الشحنات ٤٥ يوم مجانا وبعدها عن كل يوم تقعد الشحنه زياده عنده تدفعين مبلغ 


يشحن لك ع شركات شحن متخلفه حسب اختيارك 

يخيرك بين يفتح التغليف الاساسي للكرتون ولا يخليه زي ماوصله

يخيرك بين بقاء كراتين الاحذيه ولا رميها لتوفير مساحه 

يخيرك بين وضعه لصقة معرض للكسر

يخيرك بين وضع تأمين للشحنه وبين لا 

بعد طلب تغليف وشحن الشحنه يعطيكي ٧ ايام تسددين وبعدها لو مادفعتي قيمه الشحن راح يتم اتلاف شحنتك 

قبلها هو يعطيكي تقريبا بكم راح يكلف شحنك يعني لاتسوين طلب شحن الا وانتي عارفه كم التكلفه التقريبيه ،، 

طريقه تحديد السعر على اساس الوزن الحجمي ،، يعني لو شي ثقييييل بس صغير بيطلع سعر قليل ولو شي خفيف بس كبيرررر بيطلع شحن غالي ،، مره صار لنا مقلب شحنا مخده خفييفه بحدود ٨٠٠ ريال تخيلو ! لانها تاخذ مكان وكرتون كبير ،، 

انصحكم دايم اختارو اعاده تغليف ، لان مرات المواقع يرسلون كرتون كبير فخلو البريد يفتحها ويعيد تغليفها بكرتون وحجم اقتصادي ،، وطبعا الاحذيه اكيد افتحو كراتينها خصوصا لو عدد كبير وشي ماينخاف عليه ،، 


هنا لمن اعطاني بريدي الامريكي



وهنا لمن بسوي طلب شحن تجيني الخيارات 


وهذا رابط الوردشيب 
فيه واجهه باللغه العربيه بالكاامل .. لذلك مابشرح خطوات التسجيل فيه لانها عاديه ،، 




الحين ياجميلاتي صار عندكم فيزا وصار عندكم بريد امريكي ، جات خطوه الطلب 

 الخطوه الرابعه التسجيل فالمواقع والطلب 


المواقع اغلبها نفس البيانات يطلبونها بالتسجيل ،، 

ويالا نجرب نسجل فموقع مع بعض 



هذي الايقونه يعني تسجيل جديد  ،،  غالبا تلقونها فوال الصفحه من فوق فكل المواقع ،، بنات الي انجليزيتهم ضعيفه لايعوقكم هالشي ابدد انا بعطيكم خطوات نادر تتغير بالتسجيل وراح تتكرر عليكي الكلمات وتصير سهله وبتدعين لي باذن الله ،، ولو واجهتك مشكله عادي ترجمي او اسالي مو عيب  ،، 

يطلب منك الاسم والعائله وانسه ولا سيده وهكذا وكلها حطيها بياناتك الصحيحه ونفس اسمك حق الفيزا وحق الوردشيب 

بعدها الباسووردك واعاده للباسوورد

وبعده ايميلك 

واذا حابه يرسلون ع ايميلك اعلانات وعروض 

بعدها سالك بحكم اننا نجرب نسجل فموقع ساكس يقول عندك عضويه قولي لا ،، وسوي حفظ للبيانات ونشوف الي بعده 

فيه مواقع خلاص تسجلك بمجرد البيانات الي ذكرناها فوق ،  ولمن تجين تطلبين تطلب منك بيانات الفيزا والشحن  

بالبيانات الي فوق ساكس سجلني 

وتجيكي هذي صفحه التحكم 


اول خانه هي سجلات الطلبات السابقه لكي 

ثاني شي اعدادات ايميلك والاكاونت حقك من باسوورك وكذا 

ثالث شي عنوان الشحن حقك وعنوان الفواتير 

رابع شي بيانات الفيزا 

خامس شي للي عندهم بطايق ساكس ومايهمنا هالشي 

انا بطنش كل الي فوق لان مانحتاجه ، نحتاج نبدا نطلب 



الحين اخترت شي بشتريه وصورت لكم فوق كيف الموقع مقسم ومتنوع انا عيني ماتروح الا للهاند باااق :( 

شوفو ع اليمين بالاسود مكتوب اد تو باق معناتها متوفره ويمديكي تحطينها بسلة التسوق حقتك ، لو ماهي متوفره بتجي كلمه اوت اوف ستوك out  of  stock 

السعر بالدولار انا اضربه ب ٣،٨٠ ريال لان فيزه الراجحي تحسبه كذا ،، 

اضفنا الشنطه للسله 


السله تجي يمين فوق يمديكي تكملين تسوق ويمديكي خلاص تشترين بالضغط ع كلمه تشيك اوت 


هذي الصفحه الي انتقلنا لنا لمن حطينا تشيك اوت ،، فوق يمين حاط اماكانيه تغليفها كهديه او ازالتها من السله او التعديل او حفظها لوقت ثاني اشتريها ،، 

تحت ع اليمين يخيرني بين انواع الشحن واسعارها تختلف حسب الشركه وسرعه الوصول للبريد ،، وغالبا ركزو فوق فالموقع يحطون كودات خصومات او شحن مجاني يصير حطوها بمكان كلمة promo code الي ع اليسار  



شوفو حطيت كود وطاح علي سعر الشحن ٢٠ دولار وصار مجاني 



هنا لمن كملت التشيك اوت نقلني لخطوه عنوان الشحن تنقلينها بالضبط زي ماكتبها لك الوردشيب وتحطين اسمك المسجل بالوردشيب 

مرات بعد تحطون المدينه وتسوون كونتنيو تشيك اوت تلاحظون السعر ارتفع نتيجه اضافه التاااكس ، يعني ع هالشنطه التاكس ٢٦٠ ريال زياده ، مو كل المواقع تاخذ تاكس .. 


هنا خطوه الدفع يطلب منك نوع بطاقتك قولي فيزا او غيره ، وحطي الاسم الي ع البطاقه ورقمها  وتاريخ الانتهاء والسيكيورتي كود الي ورا عباره عن ٣ ارقام خلف البطاقه ، 

وسوي كونتنيو 

بعدها ان شاء الله الامور تمام راح يذكر لك العنوان وتفاصيل طلبك للتاكيد وتسوين كونتنيو ويتم الطلب ويرسل ايميل بالتفاصيل ،، 

بعض المواقع ماتقبل فيزة الراجحي ، وبعضهم يقبل ويسحب المبلغ او يخليه معلق ويقولك ماقبلته ، لاتتوترين عادي ياخذ كم ساعه ويرججع ولو مارجع تاكدي من البنك قوليلهم معلق او مسحوب ، الامور سهاله والمواقع حقانيين يعني لاتخافين .. 

بعد كم يوم اذا وصل طلبك للوردشيب راح يرسلونك ايميل  ويضيفون شحنتك وتشوفين انها موجوده بالموقع انها واصله باسمك ويبدون يحسبون ال ٤٥ يوم ،، مرات تحصل ان الوردشيب مايرسل ايميل انتي كلميهم بالمحادثه الفوريه زي الشات وعطيه رقم التتبع للشحنه الي موقع الطلب ارسله لك وهم يتاكدون ، انا كم مره تحصل ان الشحنه توصلهم بدون اسم واضح فتبقى مايدرون هي حقت مين ههههه لين اعطيهم رقم التتبع ويضيفونها لشحناتي ،، 


الحين بعطيكم مواقع انا مجربتها وتقبل فيزه الراجحي وتقريبا متوفر فيها اغلب الاشياء الي نحبها احنى البنات ،، 




الموقعين تبع لبعض باشتراك واحد وسله واحده لكن مختلفين بالمحتوى الاول للاشياء منخفضه السعر وكانه صيدلية بووتس مثلا ، والثاني للاشياء الاعلى سعرا زي اوربن ديكاي وماركات المكياج والتجميل والشعر والصحه وكل شي  الكثيررره غيرها




فكتوريا وبينك تبع بعض زي الي فوق ،، 







وبس ياجميلااااتي هذاا كل الي ببالي 


يارب الموضوع فادكم ومابي الا دعواتكم 


14 comments:

  1. الله يسعد قلبك نوره وينور طريقك للاخره نوره قد مااستفدت منك اشيا كثيييير 🙏😭❤️

    ReplyDelete
  2. يعني برايك البطاقه الائتمانيه احسن؟ طيب كتاجره اطلب للزباين من النت ايش افضل لي؟ الله يسعد قلبك❤❤

    ReplyDelete
  3. قد طلبتي من نوردستروم - ماك بلشز ولا شادوز؟ ابغا اطلب بس مني عارفة تجي كويسة ولا تتكسر

    ReplyDelete
  4. يعطيك الف عافية على الشرح الوافي
    جبت للبنات اكود تخفيض للتسجيل بموقع ورلد شيب و زبطت معاي
    ما عندي خلفية اذا تنفع للترقية

    عروض التخفيضات من WORLD SHIP ورلدشيب




    اولا : العضويه PLUS بلس
    تخفيـــــــــــــــــــــــــــض 80% ليصبح اللاشتراك 19$ بدلا من 99$
    أستخدم كود التخفيض (WS1COM)

    ثانيا: العضوية BASIC بيسيك
    تخفيـــــــــــــــــــــــــــض 100% ليصبح اللاشتراك 0$ بدلا من 24$
    أستخدم كود التخفيض (FREEBASIC245)


    للاشتراك فقط الدخول علي
    https://www.ws1.com/Registration.aspx


    @e7sas_sara


    ReplyDelete
  5. انا مشكلتي مع موقع ايلف عجزت بالعنوان شوري علي

    ReplyDelete
  6. أنتي شّي جمممميل مرره شكرن على مجههودك 😘😘😘

    ReplyDelete
  7. يعطيك العافيه حبيبتي

    ReplyDelete
  8. حبيبتي ياليت ردين علي ..هو الاشتراك سنوي ولا شهري ؟

    ReplyDelete
  9. شي مفيد جزاك الله خير

    ReplyDelete
  10. عرض عليكم مميزات شركه Viabox حيث انها اثبتت كفاءه ومصداقيه وشفافيه عاليه

    شركه viabox هو موقع يمنحك عنوان أمريكى وذلك لشحن كل ما ترغب شراءه من الخارج إلى عنوانك فى شركة viabox. ومن ثم تقوم الشركه باعاده شحن الطرود الى عنوانك الحقيقى فى اى دوله تريد
    وفى ما يلى استعراض لاحدى مميزاتها الكثيره :
    1- شركه Viabox ارخص اسعار للشحن مقارنتا بشركات الشحن الآخرى
    2- شركه Viabox شركه الشحن الوحيده التى تقبل الدفع بال bitcoins
    3- شركه Viabox تمتاز بالسرعه فى تنفيذ الطلبات حيث يتم ذلك فى غضون يوم واحد من تقديم الطلب
    4- خدمه العملاء فى Viabox ممتازه ويتم الرد فى خلال ساعه الى 12 ساعه كحد اقصى
    5- كل طلبات اعاده لف و فحص و تصوير الطرود يتم بشكل مجانى
    6- حسابى مجانى للأبد فلا يوجد رسوم لتسجيل حساب ولا رسوم تجديد عضويه ولا رسوم شهريه ولا رسوم اضافيه يتم دفعها
    7- تقوم الشركة بالشحن إلى 220 بلدا حول العالم , وتقوم بتقديم العديد من خيارات الشحن
    اتمنى ان اكون قد افدتكم بمميزات هذه الشركه شكرا

    ReplyDelete

  11. شحن اثاث بالدمام


    شركة المنزل شركة شحن عفش بالدمام تقدم افضل خدمات النقل بالمملكة مع اكبر اسطول من السيارات المجهزة و المخصصة لاغراض النقل و الشحن و المزودة بافضل السائقين الماهرين في القيادة
    شركة المنزل شركة شحن اثاث بالدمام علي اعلي مستوي من الكفاءة و الامان
    و افضل عروض الاسعار التي لا تقبل المنافسة بالدمام


    شركة شحن عفش بالدمام


    http://elmnzel.com/moving-furniture-dammam/

    ReplyDelete
  12. شركة نظافة بجدة
    شركة نظافة بجدة شركة الياسمينة للخدمات الممنزلية أفضل شركة نظافة عامة بجدة حيث نقوم باستخدام أفضل مواد التنظيف بجدة من منظفات وادوات حديثة ونقدم خدم التنظيف بالبخار فى جدة عبر أرخص شركات تنظيف بالبخار بجدة وننظف المجالس والسجاد والموكيت والمفروشات والستائر بالبخار بجدة .
    شركة تنظيف بالبخار بجدة

    ReplyDelete
  13. 😍 البديل الطبيعي لعمليات التكميم كلين9🍃🌸انقاص اكثر من عشر كيلو غرام في اقل من شهر وداعآ للسمنه بي اقل الاسعار 💪00249121146698

    ReplyDelete
  14. للطلب من المواقع الشهيرة بعمولة 50 ريال فقط
    التواصل واتس 00249121146698

    ReplyDelete

انبسط برآيكم واسئلتكم واقترحاتكم