مشتريات لندن London haul

ياصباح الخير لكم جميعاً 

هالبوست تاخر شوي ، عشان طلبت اون لاين فقلت أحطهم مع بعض 

تجارب ونصائح لندن والرحله عموما بتلقونها ببوست سابق 

بسم الله نبدا 

مع مشتريات كاث كيدستون، له عدة فروع انا رحت الي اخر ريجنت ستريت قريب البيكاديللي ورحت الي بالاوت ليت بس مالقيت اشياء كثير 

مريله طبخ وبيز واخذت معاها قلفز وملاعق خشب وسيلكون ويجي معاهم مناشف 

طقم اربعه من كل شي شوك وملاعق صغيره وكبيره وسكاكين

صحون طقم وعجبني ان كل واحد لون 

أكواب كل واحد لون زي الصحون 

بريق شاهي وينفع حليب وحجمه مناسب يكفي لتعبئه الاربع أكواب 

ثلاث شموع كل وحده ريحه بس ماحسيتها فواحه ولعتها ساعه وشوي وماشميت شي 

كڤر ايفون اخذته لان جوالي مات من كثر الطيحات وللاسف البلس دايم مظلوم كل الاشكال الحلوه للايفون الصغير 

كريم يد صغيرونه كل واحد ريحه 

قميص قطن يجنن مستحيل تقاومين نعومته خايفه اغسله ويخشن 

نوت للسنه الجديده ان شاءالله ، عجبني ان كل شهر له تصميم معين وحجمه قد الكف يكفي كتابه ملاحظات 

ماكون نوره اذا ماخذت هالاشياء 

بنطلون البجامه  من m&m 

والبلوزه من محل تذكارات هو والميداليات والكوب تلقونهم باكثر من مكان عند بيج بين وبكامبدن ماركت 

بجايم بريمارك وله فروع كثير انا رحت الي بأكسفورد قريب سلفرجدز كبير وزحمه روحو صباح او متاخر لان تعجزين تتفرجين لو زحمه ،  عجبتني للشتاء 

اخذت معها اكسترا شراب عارفه ان فرده بتختفي 

معليش طفولتي ماخلصت صراحه ههههههه 

كڤر للحاف والمخده من بريمارك بعد وسعره حلو مايتعدا ١٥٠ ريال بس مافي اشكال كثير 

الحلوين هذولا الي بالنص من بريمارك والباقين من محل بشارع العرب دايم اصوره لكم زي قرطاسيه موجوده بدبي مول البوابه الي عند بتيل ودايم انسى اسمه 

بو تي اول مره اجربه بس متردده قرات كلام سلبي عنه ، فيتامين إي ومجموعه زيوت للبشره ، وانا اسال عن فيتامين اي وسي للبشره ، سألني  ليش قلت ابي ترطيب ونضاره ، رشح لي الموظف الزيت الثاني قال اريح لك جامع اكثر من شي ومخصص بس للبشره عاد بجرب واقولكم كيف 

من صيدليه او محل مخصص للمكملات الغذائيه وهالامور له فروع بكل مكان قدام هارودز وباكسفورد ستريت اسمه هولاند ولوحته خضراء 

مشتريات كيكو ، الصراحه عجزت اختار وسألتكم بسناب ، ماحب الاماكن المزحومه والموسيقى الصاخبه أعجز اركز .رجعت لهم يوم ثاني ونزلتني الموظفه دور ارضي فااااضي مافي احد فركزت شوي 

قلم تحديد الشفايف أبشركم انه يجنن وضيعته ساره من اول استخدام .. قلب مكسور 

السيروم هذا من اول ابيه يعطي لمعه روعه للبشره انا اخلطه مع الفونديشن مثلا اير مات من بورجوا يخلي النتيجه مو مطفيه وفيه لمعه حلووه بالبشرهه ، المناديل الثانيه بوجهين سكراب وترطيب للبشره ع قول الموظفه للمستعجلين احس حلوه بالسفر للي ماعندها وقت 

 بيكسي طبعا البركه بولاء ، اخذنا التونر وجل مرطب للبشره المختلطه حبيته تمتصه البشره بسرعه ، ومرطب لحول العين ، وقطن فيه تونر حسب كلامهم قوته اربع أضعاف التونر ويستخدم يومين بالأسبوع 

الخمس اشياء ب ٦٠٠ ريال تقريبا 

مشتريات صيدلية سوبر درق اغلبها اعرفها ومحتاجتها مو شي جديد 

كان عندهم عرض اثنين والثالث مجانا من بورجوا ، فاخذت الفونديشن والارواج حبيتهم مره

ننجي للتشوكلت 

اغلب الي اخذته سولتد لان مالقى هنا ولان اعشق تداخل الشوكلاته مع الملححح تلقونهم بهارودز او ليبرتي ولهم محل لحاله 

من السوبر ماركت عندهم تشتهين تجهزين مائده مليان اشياء جاهزه وبس تتسخن ولذذذيذه

بالصوره الباي ماعجبني لانه حامض بس كيكة التمر بالتوفي قاااااتله جدا انتبهو للتاريخ وتستحمل نقل او لا وطبعا الكحول وهالاشياء 

من m&m

هوت شوكلت وخلطة كوكيز بس تضيفين حليب

بس نبهوني البنات انه مو حلال :(

سلك شاحن من أبل ستور ، الي هنا شاكه فيهم دايم ناخذ وع طول يخربون فأخذنا نص درزن احتياط ب ٩٠ ريال تقريبا 

شاهي ماخذته الا عشان العلبه اعترف وكوب من هارودز

شوز نايك اخذته من فرع ليبرتي هادي وفيه كل الاشياء بريجنت ستريت ب ٤٠٠ ريال تقريبا 

نجي للحب شانيل 

السلسال حب من اول نظره يمكن كان اسرع قرار بحياتي خخ ، فرع جده بالقطاره يجيبون ، ففرحت مررره يوم شفته 

والحب ديالي 

اللون روز قولد مو برونز ، والي عجبني ان الحدايد روز واول مره اشوفه بشانيل ،حجمها زي الميديم من الكلاسيك وجلدها نوع بين اللامب والكاڤيار مو ناعم ولا خشن مره ،  أخذتهم من فرع سيلفردجز ومالقيتها بولا فرع ثاني هناك ..

اللون بشكل أوضح 

خلصنا من لندن نجي للاون لاين  طلبته من far fetch 

الشوز من اول عاجبني بس كم مره يصير شي مقاس مايضبط او مالقاه مخلص اون لاين بس الحمدلله لقيته ، للاسف من لبستين توسخ يقهر يبغى له عبايه مرتفعه مره

الحب الثاني ، اذا بتطلبون اون لاين انا اخذت نفس مقاسي 

الي من اول مشجعني ع الكعب طوله احتاج شي عالي مره غير لوبوتان ويكون مريح فهذا عز الطلب يعتبر من الاشياء المريحه مايتقارن بلوبوتان ابدا 

وبس ياحلوين اكتبو لي هنا وانستغرام اش حبيتو اكثر 

احببببكم