Review Clarisonic Mia كلارسونيك ميا ، غسولات وروتين عنايه

السلام عليكم ورحمة الله وبركاته 

ريفيو اليوم عن جهاز كلارسونيك ميا .. Clarisonic Mia

حاليا لي ٨ شهور ونص استخدم الجهاز ..

وصف الجهاز : 

جهاز يشتغل لمده دقيقه وحده فقط ، لتنظيف الوجه ، يعدك الجهاز بتقليل الخطوط التعبيريه فالوجه وتقليل المسام والدهون فالبشره ، ويهيأ البشره لاستقبال عنايتك فيها من كريمات وسيروم .. الخ 

طريقة استخدام الجهاز :

تغسلين وجهك بالمويه ، وتحطين الغسول وتمررين الجهاز ع بشرتك بمعدل ٢٠ ثانيه للجبهه ، ٢٠ ثانيه للانف والدقن و ١٠ ثواني لكل خد ، 

تجربتي الشخصيه مع الجهاز : 

ماصرت استغني عنه ابدددا بعد مامسح الميك اب ، وبدونه احس اني مازلت مامسحت شي ، 

طريقتي امسح ميك اب العيون بقطن ومنظف ، امرر قطنه بمزيل ميك اب ع بشرتي مره وحده ، وبعدين اغسل وجهي واحط الغسول واستخدم الجهاز ، واتفاجأ باللون الي يطلع بالفرشه كل الاساس والبلاشر يتنظف وتحسين بفرق عن استخدام القطن لوحده ، بحكم انه يزيل الميك اب ٦ مرات اكثر من اي شي اخر ، فاستخدامك المره الثانيه للميك اب تلاحظين ثبات الفونديشن و

مشاكل واجهتكم من الجهاز وسالتوني عنها :

كثير بنات يشتكون من ظهور حبوب بعد استخدام الكلارسونيك ، او توسع فالمسام ، كل هذي المشاكل من تجربتي بسبب مشكلتين ، 

الاولي : 

عدم قفل المسام بعد استخدام الجهاز ، يعني ضروري جدددا استخدام تونر او تمرير قطعه من الثلج على وجهك 

وبعدها تستخدمين كريماتك حسب روتينك واحتياج بشرتك 

الثانيه : 

لاتقسين ع بشرتك ! مو لو كتبو ان الجهاز يستخدم مره يومياا تطبقين هالشي ؟ انتي اعرف الناس ببشرتك ونوعها 

انا استخدامي لها بعد كل ميك اب فقط لا غير ، يعني لو يوميا احط يوميا استخدم والعكس صحيح في حال ماحطيت ماستخدمها  ،

واستبدل استخدام الجهاز بمقشر ، سكراب للبشره او ماسك 

اختيار الفرشه : 

فيه عده انواع من فرشه كلارسونيك بحسب نوع بشرتك ، بالنسبه لي بشره حساسه 

يفضل تغيير الفرشه كل 3 اشهر 

وهنا مقارنه بين الفرشتين الجديده والقديمه 

الغسولات الي استخدمها مع الكلارسونيك : 

غسول اروما بيرفكشن aroma perfection

من nuxe 

للبشره الدهنيه المختلطه ، يعادل لي الدهون فالتي زون ومايجفف لي الخدود ابدا  وخفيف ع البشره  ، وفيه التونر حقه يعني جميل تستخدمينهم مع بعض .. 

او 

-step Skin Care System ٣

من Clinic

استخدمتها قبل سنه ممكن وجففت بشرتي وشدتها مره ، وكان مثل المشكله الثانيه فوق اني قسيت عليها ، بوصف المنتج انك تستخدمينه مرتين يوميا ، طبعا هالشي بالنسبه لي مستحيل واكيد بيرجع يعدم بشرتي ، فتقريبا بعد كل ميك اب او ٣ مرات اسبوعيا 

الخطوه الاولى ، غسول 

الثانيه ،تونر لكن معالج ومع الوقت يمنع ظهور الحبوب ويوحد لون البشره 

الخطوه الثالثه كريم ترطيب 

او 

 غسول كلارسونيك الي جا معاها 

Clarisonic 

من اول ماشريتها ع طول اخذت حق nuxe عشان مابغى يعجبني حق كلارسونيك ويخلص واطلبه اون لاين وافقده لين مايوصل ههههههه 

بعدين عطيته فرصه وطلع جميل تحسين بنظاااافه وريحته حلووه حبيتها 

وبعدين ؟ 

مسحت الميك اب ، واستخدمت الجهاز  وصارت بشرتي نظيفففه وش الخطوه الي بعدها ؟ 

استخدمي تونررر عشان تتقفل المسامات 

اختاري الي يعجببك من اي براند تحبينها ، انا مرتاحه لاستخدام قطعه ثلج امررها ع بشرتي و او تونر من بووتس botanics خفيف وريحته مو شينه امرره بقطنه ع بشرتي 

الخطوه الاخيره ؟ 

يبقى الان تعرفين احتياج بشرتك ، تبغين نضاره ؟ عندك حبوب ؟ علامات تقدم فسن البشره ؟ اعرفي مشكلتك وابحثي عن الحل لها ، واستخدمي الكريم او السيروم الان ، راح تكون فعاليته مضاعفه اكثر بحكم ان بشرتك جاهزه لاستقباله 

بالنسبه لي هالخطوه تختلف بختلاف الموسم ومشكله البشره 

مرات كريم QV

مرات فازلين

ومرات سيروم فيتامين سي 

وفبعض المرات الدراي اويل ، الزيت الجاف من NUXE 

اهم شي لاتتركين بشرتك عطشانه بعد الغسول .. 

اماكن الشراء :

غير متوفره فالسعوديه ، موجوده في سيفورا خارج المملكه 

او اون لاين ، من امازون او موقعهم مباشره 

http://www.clarisonic.com/

ولاحظت تاجرات يوفرونها 

الاسعار :

بالنسبه لحقتي ميا ب 125 دولار ،، يعني تقريبا 470 ريال 

وتختلف الاسعار بالنسبه للانواع الثانيه بعضها وجه وجسم وبعضها سرعتين او اكثر .. 

هذا كل الي عندي بالنسبه للكلارسونيك ويارب البوست يكون مفيدد لكم وشاركوني تجاربكم هنا او ع الانستغرام وتويتر
 ..