اكسسوارات شانيل تجربتي الشامله ..

ياهلا وسهلا فيكم جميعا 

يارب الكل بخير وصحه 

فكره البوست هذا من مده ببالي لكثره الاسئله الي تنطرح لي لمن اكون فوبتيك شانيل واصور سناب او انستغرام عن الاسعار وغيرها

وقتها يكون صعب تغطيه كل قطعه بسعرها لانه وقتي محدود فالبوتيك وغالبا ممنوع التصوير ..

اعتقد مافي افضل من تجربه سنين احكي لكم اياها ،،

علاقة عشقي لاكسسوارات شانيل لانهائية يعني حقيقية أمسك نفسي بصعوبه قدامها ، انا بطبعي أنثى تعشق الولو فمرضيني هالجانب باكسسورات شانيل ،

المميز فيها انها لك وللعمر ، وشايفين كيف اكاونتات الڤنتج ماشاءالله ماشي سوقها ،، 

نجي للاسعار عموما فكل اكسسواراتهم من حلقان خواتم سلاسل من ١٠٠٠ ريال وطالع مستحيل تلقين اقل الا مثلا ٩٨٠ ريال وهكذا ، يعني اذا ميزانيتك ١٥٠٠ بيكون قدامك خيارات كثير اما اقل من ١٠٠٠ نادر يكون قدامك خيار ،، اما البروشات والاحزمه تقريبا مافي اقل من ١٦٠٠ ريال الا ماندر . 

احس اسعارهم مناسبه لبراند عريق مثلهم ومقارنه ببراندات ثانيه مقاربه بالسعر ومرات اغلا وكواليتي سيء جدا 

نجي للجوده ، كل قطعي من شانيل لونها فضي وبدون فصوص ماعدا التعليقه فيها كم فص ، الحمدلله ماشيه معي زي الحلاوه من خمس سنين اقدم شي عندي منهم ، مايتغير لونها ولا طاح اللولو ولا تمخش لكن للامانه انا طبعي احب احافظ ع أشياءي يعني مستحيل اخليها متعقده او مرميه مع باقي الاشياء الا لو يوم جيت تعبانه مثلا بس ماخليها للابد ، واللؤلؤ ماجربت اتروش وانا لابسه يعني ماعرف ايش تأثير المويه عليه يتقشر او لا ، لكن ابخ عطور وماتاثرت ، وافضل لمن تفسخون اي قطعه اكسسوار عندكم مسحوها بمنديل او قطعه قماش عشان ماتمسك فيها العطور وتأثر عليها ع المدى البعيد ، 

بسم الله نبدا بالصور ويكفي كلام ..

الحلقان  

هذا كان منه حجمين اخذت الصغير يجنن يومي بالأذن والدوامات 

هذا اللوقو صغيرون وتحته كرستاله 

هذا عيبه القفل من ورا الموديل الي يصك ع الإذن يجيب الصداع مررره كل مره اقول بغيره وأنسى :(

احجام الحلقان جنب بعض ،،اسعارهم ماتجاوزت ١٣٠٠ ريال للواحد 

الخاتم 

عجبني انه ينفع البسه مع بعض او اصباعين ..

للحين متوفر بالبوتيك شفته قبل كم يوم وسعره ١٠١٠ ريال للاثنين مع بعض 

التعليقه عاجبني حجمها تضيف لمسه جميله للبس ، لها قفلين ينفع طويله او قصيره ومو ثابته فالسلسله يعني ينفع تطلعونها .. اخذتها من شانيل لندن ب ١١٠٠ ريال 

البروش من الاشياء الي ماتنلبس كثير بس تضيف لمسه كلاسيكيه لو دخل بجاكيت او قميص .. ب ١٦٥٠ ريال  

حزام وينفع سلسال ، ويقصرونه لكم لو كان طويل مره 

 عيبه ان التقفيله حقته كل شوي تنفك خصوصا لو لبستيه كسلسال ، 

سعره تقريبا ١٧٠٠ ريال ومو متوفر حاليا فالبوتيك ، تلقون الي فيه جلد بين الحدايد ويوصل سعره ٤ الاف 

وبس بكذا اكون خلصت عرض مجموعتي .. ان شاء الله تكونون استفدتو وتحوز على اعجابكم ،، ختاما للي يسالون احس قطع شانيل من الاشياء الجميله للهدايا خصوصا فحفلات التخرج وهالامور .. 

انتظر تعليقاتكم سواء هنا او فالانستغرام 

احبكم 

الحمدلله هذا من فضل ربي